No marco das súas #AcciónsG de Responsabilidade Social Corporativa, a CRTVG lanza #PoñámoloACero, unha campaña de sensibilización arredor do Día Mundial da Alimentación, no que a ONU visibiliza a necesidade de reducir o desperdicio alimentario cifrado a nivel mundial no 17% entre os fogares, a restauración e a venda retallista. Como socia do Pacto Mundial das Nacións Unidas de España, o obxectivo da CRTVG é contribuír á difusión dos Obxectivos de Desenvolvemento Sostible (ODS) en Galicia, neste caso do Obxectivo número 3, Saúde e benestar, e o número 12, Produción e consumo responsables, que trata de cambiar o modelo actual de produción e consumo para conseguir unha xestión eficiente dos recursos naturais.