Letras Galegas 2020
Ricardo Carvalho Calero

A CRTVG é socia do Pacto Mundial das Nacións Unidas e encadra as súas accións de Responsabilidade Social Corporativa no marco dos Obxectivos de Desenvolvemento Sustentable (ODS) de Nacións Unidas. Esta nova acción que a CRTVG pon en marcha arredor do Día das Letras Galegas 2020 enmárcase dentro do ODS número catro que fai referencia a unha Educación de Calidade.

Cinco cousas sobre Ricardo Carvalho Calero

Ricardo Carvalho Calero é unha das figuras máis relevantes da cultura galega da segunda metade do século XX, e tamén está considerado o ideólogo do reintegracionismo lingüístico.

Este ano dedicouse o Día das Letras Galegas a Ricardo Carvalho Calero, coincidindo este 2020 como o 110º aniversario do seu nacemento e o 30º do seu pasamento.

Que máis deberiamos saber del? Alba Mancebo explícanos cinco curiosidades da súa biografía nesta peza audiovisual.

Ricardo Carvalho Calero a través da súa obra

Neste vídeo, a xornalista Bea Gutiérrez fai un repaso dalgunhas das obras máis representativas do escritor e filólogo ferrolán. Carvalho Calero escribiu narrativa, poesía, ensaio e teatro, sendo a poesía o xénero co que máis se chegou a identificar.

Tamén foi o autor da primeira novela escrita en galego publicada despois da Guerra Civil, A xente da barreira (1950), que marcou o inicio da narrativa galega de posguerra.

Carvalho Calero en #cultura365

Carvalho Calero no Diario Cultural

Escoitamos as voces novas da poesía galega

Antón Blanco

(O Carril, Vilagarcía de Arousa, 1996) é poeta e estudante de Filoloxía na Universidade de Santiago de Compostela. Acadou o primeiro premio de poesía da XLII edición dos Premios Minerva e publicou textos nas revistas Dorna e Grial.

Jesús Castro Yáñez

(Baltar, A Pastoriza, 1992) é poeta e odontólogo. Con 17 anos gañou o premio Minerva de poesía e, tres anos despois, o II Premio de Poesía Díaz Jácome (2012), entre outros recoñecementos. A súa última obra, Ultramarino, foi publicada no ano 2017.

Alba Cid

(Ourense, 1989) é poeta e investigadora en poesía contemporánea. Publica textos de creación e recensións nas revistas Grial, Luzes, Tempos Novos e Dorna, e é colaboradora da Radio Galega. Os seus poemas foron traducidos para o castelán, o grego, o inglés e o portugués. Na actualidade, encárgase do John Rutherford Centre for Galician Studies, da Universidade de Oxford.

Lara Dopazo

(Marín, 1985) é escritora e licenciada en Xornalismo. Ten un mestrado en Cooperación Internacional e outro en Filosofía Práctica. Publicou, entre outras obras, Clementina (2016), Os lobos na casa de Esaú (2017) e Claus e o alacrán (2018).

Alicia Fernández

(Escairón, O Saviñao, 1987) é poeta e licenciada en Filoloxía Galega pola USC. Publicou poemas en revistas literarias como A Caramuxa, A ciegas, Dorna e Xistral e impartiu obradoiros de escritura creativa. No ano 2019 conseguiu o Premio de Poesía Fiz Vergara por Mamá pelícan

Noelia Gómez

(Rianxo, 1995) é graduada en Xornalismo e ten un mestrado en Estudos Comparativos de Literatura, Arte e Pensamento pola Universitat Pompeu Fabra. En 2015 gañou o Torneo de Poesía Recitada Ferve a Lingua. A súa obra O xiro obtivo, en 2018, o V Premio de Poesía Gonzalo López Abente.

Gonzalo Hermo

(Taragoña, Rianxo, 1987) é poeta e licenciado en Filoloxía Inglesa pola USC. As súas primeiras escrituras foron publicadas en revistas como Dorna, Andar 21 ou Nova Ólisbos. En 2018 publicou o poemario A vida salvaxe.

Oriana Méndez

(Vigo, 1984) é poeta e licenciada en Filoloxía Galega. Filla do escritor Xosé Luis Méndez Ferrín e Moncha Fuentes, o seu labor poético comezou na revista cultural A Caramuxa no ano 2000. En 2019 foi galardoada co premio do V Certame de Poesía Rosalía de Castro de Padrón coa súa obra O corazón pronúnciase extenso.

Ismael Ramos

(Mazaricos, 1994) é poeta e escritor. Algúns dos seus textos foron publicados en A Bacana, Clarín, Grial, Luzes, PlayGround, Waxwing ou Dorna; e traducidos ao español, inglés, francés e portugués. O seu libro Lumes (2017) foi galardoado co Premio Fervenzas Literarias ao mellor libro de poesía.

Regina Touceda

(Cuntis, 1999) é poeta e estudante de Filoloxía Galega na Universidade de Santiago de Compostela. En 2019 gañou o premio de poesía Pérez Parallé co poemario Deriva.

#DígochoEu Especial Reintegracionismo